ಪ್ರೀತಿ ಶರಧಿಯಲಿ ಪ್ರೇಮನೌಕೆ

ಗೆಳತೀ ಸರಿಯಾಗಿ ಕೇಳಿಸಿಕೋ
ಇನ್ನು ಬಚ್ಚಿಡಲಾರೆ ಮನದ ಮಾತನ್ನು
ಹೊರಬರಲು ಕಾದಿರುವ ಪ್ರೇಮವಚನಗಳನ್ನು
ಕಿವಿಯಾಗು ಆತ್ಮಸಮ್ಮಿಲನಗೊಳಿಸುವ ನುಡಿಗಳಿಗೆ

ಸ್ನೇಹವೋ ಪ್ರೀತಿಯೋ ಅಂದು ತಿಳಿಯಲಿಲ್ಲ
ಗೊಂದಲದ ಗೂಡಾಗಿತ್ತೆನ್ನ ಹೃದಯ ಮಂದಿರ
ಪ್ರೀತಿಯನು ಮೀರಿದ್ದಂತೆ ಗೆಳೆತನ
ಬದುಕಿಗೆ ಆಧಾರವಂತೆ ಪ್ರೀತಿ ಪ್ರೇಮ

ಸ್ನೇಹ ಪ್ರೀತಿಯ ಸುಳಿಯಲಿ ತೊಳಲಾಡಿದೆ
ಗೆಳಯನಾಗಲೋ ಪ್ರೇಮಿಯಾಗಲೋ ಅರಿಯದಾದೆ
ಪ್ರಾಣದ ಸ್ನೇಹಿತರು ಹಲವರಿದ್ದರು
ನನ್ನ ಮನ ಮಾತ್ರ ಪ್ರೇಮಿಗಾಗಿ ಹಂಬಲಿಸುತ್ತಿತ್ತು

ಪ್ರೀತಿಯ ಅಗಾಧತೆಯನ್ನು ಅರಿಯಲೆತ್ನಿಸಿದೆ
ಆದರೆ ನನ್ನನ್ನು ನಾನೇ ಅರಿಯದಾದೆ
ಪ್ರೀತಿ ಪ್ರೇಮದ ಪರಿಧಿ ಅನಂತವಂತೆ
ಇಬ್ಬರೂ ಜೊತೆಯಾದರೆ ಮಾತ್ರ ಶೋಧಿಸಬಹುದೇನೋ

ಗೆಳತಿಯಿಂದ ಪ್ರೇಮಿಯ ಪಟ್ಟ ಕೊಟ್ಟೆ ನಿನಗೆ
ಪ್ರೇಮಶರಧಿಯಲಿ ಒಂದಾಗಿ ಸಾಗೋಣ ಬಾ
ಪ್ರೇಮದ ದೋಣಿಗೆ ಪ್ರೀತಿಯೇ ಹರಿಗೋಲಾಗಲಿ
ಪ್ರವಾಹದಲೂ ಪ್ರೇಮದ ಜಹಜು ಮುಳುಗದಿರಲಿ

ಬಾಹ್ಯಪ್ರಪಂಚದಲ್ಲಿರುವುದು ಸಪ್ತ ಸಾಗರವಂತೆ
ಪ್ರೇಮಪ್ರಪಂಚದಲಿ ಅದೆಷ್ಟು ಸಾಗರಗಳೋ ನಾ ಕಾಣೆ
ನೀ ಜೊತೆಯಾದರೆ ಎಲ್ಲವನ್ನೂ ದಾಟಬಹುದು
ಬದುಕು ಮುಳುಗಿದರೂ ಅಮರಪ್ರೇಮಿಗಳಾಗಬಹುದು

ಮನದ ಮಾತ ಕೇಳಿದೆಯಲ್ಲ ಗೆಳತಿ
ಇನ್ನಾದರೂ ನನ್ನ ಸ್ವೀಕರಿಸು ಪ್ರಿಯೆ
ಕಾದಿರುವೆ ಪ್ರೀತಿಯ ಸಮುದ್ರತೀರದಲಿ
ಪ್ರೇಮದನೌಕೆಯನೇರಿ ಪಯಣಿಸಲು

ನೀ ನಿರಾಶೆಗೊಳಿಸಲಾರೆ ಎಂಬ ಅರಿವಿದೆ
ಆದರೂ ನಿನ್ನ ಉತ್ತರಕ್ಕೆ ಕಾಯುತಿರುವೆ
ಪ್ರೇಮನೌಕೆಯನು ಏಕಾಂಗಿಯಾಗಿ ಮುನ್ನಡೆಸಲಾರೆ
ಬೇಗ ಬಂದೆನಗೆ ಆಸರೆಯಾಗು ಸಖಿ

Advertisements
Posted in ಪದ್ಯ ಪ್ರಪಂಚ | Leave a comment

ಕೆಂಪುಬಾವುಟದ ಖದೀಮರ ಮುಖವಾಡ ಕಳಚುವ ‘Buddha in a traffic jam’

“ಸಾಯುವ ಮೊದಲು ನನಗೊಂದು ಆಸೆಯಿದೆ.ದೆಹಲಿ,ಕಲ್ಕತ್ತಾ,ವಾರಣಾಸಿ,ಚೆನ್ನೈ,ಮುಂಬೈ ಮುಂತಾದ ನಗರಗಳ ಬೀದಿಗಳಲ್ಲಿ ಸಾವಿರಾರು ಕಾಮ್ರೇಡ್’ಗಳು ತಂಡೋಪತಂಡವಾಗಿ ‘ಲಾಲ್ ಸಲಾಂ’ ಎಂದು ಕೂಗುತ್ತ ಕೆಂಪುಬಾವುಟ ಹಿಡಿದು ಮೆರವಣಿಗೆ ಮಾಡಬೇಕು.ಆಳುವ ಸರ್ಕಾರದ ಪ್ರತಿನಿಧಿಗಳ ಅಧಿಕಾರಶಾಹಿಯ ರಕ್ತ ಹೊರಚೆಲ್ಲಿ ನೆಲವೆಲ್ಲ ಕೆಂಬಣ್ಣಕ್ಕೆ ತಿರುಗಬೇಕು.ಕಾಮ್ರೇಡ್’ಗಳು ಆಡಳಿತ ಸರ್ಕಾರವನ್ನು ಕಿತ್ತೊಗೆದು ತಮ್ಮ ಪ್ರಭುತ್ವ ಸಾಧಿಸಬೇಕು” ಹೀಗೆಂದು ಹೇಳುವುದು ‘Buddha in a traffic jam’ ಸಿನಿಮಾದ ಪ್ರೊಫೇಸರ್ ರಂಜನ್ ಭಟ್ಕಿ ಎಂಬ ಪಾತ್ರ.ವಿವೇಕ್ ಅಗ್ನಿಹೋತ್ರಿಯವರು ಕಥೆ,ಚಿತ್ರಕಥೆ ಬರೆದು ನಿರ್ದೇಶಿಸಿದ್ದ ‘Buddha in a traffic jam’ ದೆಹಲಿಯ ಜವಾಹರ್ ಲಾಲ್ ನೆಹರೂ ವಿಶ್ವವಿದ್ಯಾಲಯದಲ್ಲಿ ಉಮರ್ ಖಲೀದ್ ಮತ್ತು ಕನ್ಹಯ್ಯ ಕುಮಾರ್ ಅವರ ದೇಶದ್ರೋಹದ ಘೋಷಣೆಯ ಪ್ರಕರಣದ ಸಮಯದಲ್ಲಿ ಭಾರೀ ಚರ್ಚೆ ಮಾಡಿತ್ತು.ಸಿನಿಮಾ ಬಿಡುಗಡೆಗೂ ಮೊದಲೇ ವಿವೇಕ್ ಅಗ್ನಿಹೋತ್ರಿ ಇದನ್ನು JNU ನಲ್ಲಿ ವಿದ್ಯಾರ್ಥಿಗಳಿಗೆ ತೋರಿಸಬೇಕೆಂದಿದ್ದರು.ಆದರೆ ಅಲ್ಲಿ ನಡೆದ ದೊಂಬಿಗಳಿಂದಾಗಿ ಕ್ಯಾಂಪಸ್ ಒಳಗಡೆ ಸಿನಿಮಾ ಪ್ರದರ್ಶನಕ್ಕೆ ಅವಕಾಶ ಸಿಕ್ಕಿರಲಿಲ್ಲ.
buddha_in_a_traffic_jam
ಕಮ್ಯುನಿಸ್ಟರು,ಮಾವೋವಾದಿಗಳು,ನಕ್ಸಲರು ಇವರು ಯಾರೂ ನಮ್ಮ ದೇಶಕ್ಕೆ ಹೊಸಬರಲ್ಲ.ಲಾಲ್ ಸಲಾಂ ಹೆಸರಲ್ಲಿ ಇವರು ಹರಿಸಿದ ಅಮಾಯಕರ ರಕ್ತಕ್ಕೆ ಲೆಕ್ಕವೇ ಇಲ್ಲ.ಆದರೆ ಇವರಿಗೆಲ್ಲ ಕ್ರಾಂತಿ,ಬಡವರಿಗೆ,ಆದಿವಾಸಿಗಳಿಗೆ ನ್ಯಾಯ ಕೊಡಿಸುವುದು ಎಂಬುದೆಲ್ಲ ಒಂದು ನೆಪ ಮಾತ್ರ.ಕಷ್ಟಪಟ್ಟು ದುಡಿದು ತಿನ್ನಲಾಗದ ಒಂದಷ್ಟು ಜನ ಕಾಡು ಸೇರಿಕೊಂಡು ನಕ್ಸಲ್ ಕ್ರಾಂತಿಯ ಹೆಸರಲ್ಲಿ ಒಂದಷ್ಟು NGO ಗಳಿಂದ ನಿರಂತರವಾಗಿ ಹಣ ಪಡೆಯುತ್ತ ಬಂದಿದ್ದಾರೆ.ತಮ್ಮ ಸಿದ್ಧಾಂತಗಳೆಲ್ಲ ಅವರಿಗೆ ಭಾಷಣ ಮಾಡಲು,ಪೀತಪತ್ರಿಕೆಗಳಲ್ಲಿ ಲೇಖನ ಬರೆಯಲು ಮಾತ್ರ.ಅವರಿಗೆ ಬೇಕಾಗಿರುವುದು ಹಣ ಮತ್ತು ಒಂದಷ್ಟು ಹೆಸರು ಅಷ್ಟೇ.ಅದಕ್ಕೆ ಮುಗ್ಧ ಜನರನ್ನು,ಆದಿವಾಸಿಗಳನ್ನು ದಾಳವನ್ನಾಗಿಸಿಕೊಳ್ಳುತ್ತಾರೆ.ಇಂಥ ಕೆಂಪು ಬಾವುಟದ ವೀರರಿಗೆ ಸಹಾಯ ಮಾಡಲೆಂದು ಒಂದಷ್ಟು NGO ಗಳಿವೆ.ಸರ್ಕಾರದಿಂದ ಅವುಗಳಿಗೆ ಹಣವೂ ಬರುತ್ತದೆ.ಎಲ್ಲೆಲ್ಲಿಂದಲೋ ಅಪಾರ ಪ್ರಮಾಣದಲ್ಲಿ ಕಪ್ಪುಹಣ ದೇಣಿಗೆಯಾಗಿ ಬರುತ್ತದೆ.ಈ ಹಣದಿಂದ ಹೊಟ್ಟೆ ತುಂಬುವುದು NGO ಗಳ ಸದಸ್ಯರದ್ದು,ದೇಶದ ಪ್ರಮುಖ ವಿಶ್ವವಿದ್ಯಾಲಯಗಳಲ್ಲಿ ವಿದ್ಯಾರ್ಥಿಗಳ ಮನಸ್ಸಲ್ಲಿ ನಕ್ಸಲ್ ವಾದವನ್ನು ತುಂಬುತ್ತಿರುವ ಪ್ರೊಫೇಸರ್’ಗಳದ್ದು,ಸರ್ಕಾರದಲ್ಲಿ ತಮ್ಮ ಪ್ರಭಾವ ಬೀರಲು ಸಾಮರ್ಥ್ಯವುಳ್ಳ ಒಂದಷ್ಟು ಪತ್ರಕರ್ತರದ್ದು ಮತ್ತು ಕಂಡವರ ಮಕ್ಕಳಿಗೆ ಕೋವಿ ಕೊಟ್ಟು ಮುಗ್ಧ ಜನರ ರಕ್ತ ಹರಿಸುವ ನಕ್ಸಲ್ ಮುಖಂಡರದ್ದು.ಬಡವರು,ಆದಿವಾಸಿಗಳು ಮೊದಲು ಹೇಗಿದ್ದಾರೋ ಈಗಲೂ ಹಾಗೇ ಇದ್ದಾರೆ.ಮುಂದೂ ಹಾಗೆಯೇ ಇರುತ್ತಾರೆ.ಅವರ ಹೆಸರಲ್ಲಿ ತಮ್ಮ ಬೇಳೆ ಬೇಯಿಸಿಕೊಳ್ಳುವವರು ಕೆಂಪು ಬಾವುಟದ ಖದೀಮರು.ಇವರ ಕ್ರೌರ್ಯ ಎಷ್ಟು ಅತಿರೇಕಕ್ಕೆ ಹೋಗಿದೆಯೆಂದರೆ ಬಾಹ್ಯ ಭಯೋತ್ಪಾದನೆಯ ಜೊತೆಗೇ ನಮ್ಮ ದೇಶದೊಳಗೇ ಇರುವ ಲಾಲ್ ಸಲಾಂನ ರಕ್ತ ಪಿಪಾಸುಗಳ ವಿರುದ್ಧ ಬಹಳ ಎಚ್ಚರಿಕೆಯಿಂದ ಸರ್ಕಾರ ಹೋರಾಡಬೇಕಿದೆ.ತಮ್ಮ ಉದ್ದೇಶ ಸಾಧನೆಗಾಗಿ ಮುಗ್ಧ ಗ್ರಾಮಸ್ಥರ,ಆದಿವಾಸಿಗಳ ಹೆಣ ಉರುಳಿಸುವ ಇವರನ್ನು ನಿಯಂತ್ರಿಸುವುದು ಅಷ್ಟು ಸುಲಭವಲ್ಲ.

ದೆಹಲಿಯಲ್ಲಿ Potter’s club ಹೆಸರಿನ ಒಂದು NGO ಇರುತ್ತದೆ.Indian institute of business ವಿದ್ಯಾಲಯದಲ್ಲಿ ಅರ್ಥಶಾಸ್ತ್ರದ ಪ್ರೊಫೇಸರ್ ಆಗಿರುವ ರಂಜನ್ ಭಟ್ಕಿ(ಅನುಪಮ್ ಖೇರ್) ತನ್ನ ಪತ್ನಿ ಶೀತಲ್(ಪಲ್ಲವಿ ಜೋಷಿ) ಜೊತೆ ಸೇರಿಕೊಂಡು ಹುಟ್ಟುಹಾಕಿರುವ NGO ಅದು.ಮಣ್ಣಿನ ಮಡಕೆಗಳನ್ನು ಮಾರಿ ಅದರಿಂದ ಬರುವ ಹಣದಲ್ಲಿ ಮತ್ತು ಸರ್ಕಾರದಿಂದ ಬರುವ ದೇಣಿಗೆಯಲ್ಲಿ ಆದಿವಾಸಿಗಳ ಕಲ್ಯಾಣ ಮಾಡುವುದು ಅವರ ಉದ್ದೇಶವಾಗಿರುತ್ತದೆ.ಒಂದು ಸಲ ಸರ್ಕಾರ ಇದ್ದಕ್ಕಿದ್ದಂತೆಯೇ ತನ್ನ ದೇಣಿಗೆಯನ್ನು ನಿಲ್ಲಿಸಿಬಿಡುತ್ತದೆ.ಆಗ ರಂಜನ್ ಭಟ್ಕಿ ಮಡಕೆ ಮಾರಾಟದ ಮೂಲಕವೇ ನಮಗೆ ಬೇಕಾದಷ್ಟು ಹಣ ಹುಟ್ಟುವ ಹಾಗೆ ಮಾಡಲು ಯಾವುದಾದರೂ ಪ್ಲ್ಯಾನ್ ತಯಾರಿಸುವಂತೆ ತನ್ನ ವಿದ್ಯಾರ್ಥಿಗಳಿಗೆ ಹೇಳುತ್ತಾನೆ.ವಿಕ್ರಮ್ ಪಂಡಿತ್(ಅರುಣೋದಯ್ ಸಿಂಗ್) ಎಂಬಾತ ಮಡಕೆಗಳನ್ನು ಆನ್ಲೈನ್’ನಲ್ಲಿ ಮಾರಾಟ ಮಾಡೋಣ.ಯಾವ ಮಧ್ಯವರ್ತಿಗಳ ಕಾಟವಿಲ್ಲದೇ ಹಣ ನೇರವಾಗಿ ಮಡಕೆ ತಯಾರಿಸುವ ಕಾರ್ಮಿಕರಿಗೆ ಹೋಗುತ್ತದೆ.ಆ ಮೂಲಕ ಆದಿವಾಸಿಗಳು ತಾವು ತಯಾರಿಸಿದ ಮಡಕೆಗಳ ಮಾರಟದಿಂದ ಬರುವ ಹಣದಲ್ಲಿ ಶೇಕಡಾ ತೊಂಬತ್ತರಷ್ಟನ್ನು ಪಡೆಯಲು ಸಾಧ್ಯವಾಗುತ್ತದೆ ಎನ್ನುತ್ತಾನೆ.ಈ ಯೋಜನೆಯನ್ನು ಎಲ್ಲರೂ ಒಪ್ಪಿದರೆ ಪ್ರೊ.ರಂಜನ್ ಏನಕೇನ ತಿರಸ್ಕರಿಸಿ ವಿಕ್ರಮ್ ಪಂಡಿತನನ್ನು ಬಾಯಿಗೆ ಬಂದ ಹಾಗೆ ಬೈದು ಚಾರಿಟಿಯಂತಿರುವ ನಮ್ಮ NGO ಅನ್ನು ವ್ಯಾಪಾರ ಕೇಂದ್ರವನ್ನಾಗಿ ಮಾಡುತ್ತಿದ್ದೀಯ ನೀನು ಎನ್ನುತ್ತಾನೆ.ಆದರೆ ಇದರ ಹಿಂದಿನ ಹಿಡನ್ ಅಜೆಂಡಾ ಏನೆಂದರೆ ಮಡಕೆಗಳು ಆನ್ಲೈನ್’ನಲ್ಲಿ ಮಾರಾಟವಾಗಿ ಬಿಟ್ಟರೆ ಇಷ್ಟು ವರ್ಷ ಆದಿವಾಸಿಗಳ ಅಭಿವೃದ್ಧಿಯ ಹೆಸರಲ್ಲಿ ತನಗೆ,ನಕ್ಸಲ್ ಸಿದ್ಧಾಂತವನ್ನು ಬೆಂಬಲಿಸುವ ತನ್ನ ಗೆಳೆಯರಿಗೆ,ಕೆಲವು ರಾಜಕಾರಣಿಗಳಿಗೆ ಮತ್ತು ಮುಖ್ಯವಾಗಿ ನಕ್ಸಲರಿಗೆ ಸಿಗುತ್ತಿದ್ದ ಹಣವು ನಿಂತು ಹೋಗುತ್ತದೆ.ಹಾಗಾಗಿ ವಿಕ್ರಮ್ ಪಂಡಿತನ ಯೋಜನೆಯನ್ನು ತಡೆಯಲೇ ಬೇಕು ಅಂತ ಪಣ ತೊಡುತ್ತಾನೆ.ರಂಜನ್ ಇದರಲ್ಲಿ ಯಶಸ್ವಿಯಾಗುತ್ತಾನೆಯೇ,ನಕ್ಸಲರಿಗೆ ಮೊದಲಿನಂತೆಯೇ ಹಣ ಸಿಗುತ್ತದೆಯೇ,ವಿಕ್ರಮ್ ಏನಾಗುತ್ತಾನೆ ಎಂಬುದನ್ನು ತಿಳಿಯಲು ನೀವು ‘Buddha in a traffic jam’ ಸಿನಿಮಾ ನೋಡಬೇಕು.

ವಿದ್ಯಾರ್ಥಿಗಳ ತಲೆಯಲ್ಲಿ ನಕ್ಸಲ್ ವಾದವನ್ನು ತುಂಬುವ,ಅವರ ಬ್ರೈನ್ ವಾಶ್ ಮಾಡಿ ತಮ್ಮ ಸಿದ್ಧಾಂತಗಳಿಗೆ ಅವರು ಪ್ರೇರಿತರಾಗುವಂತೆ ಮಾಡಿ ಕೆಂಪು ಕ್ರಾಂತಿಯ ಹೆಸರಲ್ಲಿ ಮುಗ್ಧರನ್ನು ನಕ್ಸಲರನ್ನಾಗಿಸುವ ಕೆಲಸದಲ್ಲಿ ಕೆಲವು ದೊಡ್ಡ ದೊಡ್ಡ ವಿಶ್ವವಿದ್ಯಾಲಯಗಳ ಪ್ರೊಫೇಸರ್’ಗಳು ತೊಡಗಿಕೊಂಡಿದ್ದಾರೆ.ದಮನಿತರಿಗೆ ನ್ಯಾಯ ಒದಗಿಸಲು ಕೆಂಪು ಕ್ರಾಂತಿ ಮಾಡುತ್ತೇವೆ ಎನ್ನುವ ಈ ಎಡಪಂಥೀಯ ವಿಚಾರಧಾರೆಯವರಿಗೆ ದೇಶಕ್ಕಿಂತಲೂ ತಮ್ಮ ಸಿದ್ಧಾಂತವೇ ಮುಖ್ಯ.ತಮ್ಮ ಉದ್ದೇಶ ಸಾಧನೆಗಾಗಿ ದೇಶಕ್ಕೇ ಆಪತ್ತು ತಂದೊಡ್ಡಲೂ ಇವರು ಹೇಸುವುದಿಲ್ಲ.ಇಂಥ ರಕ್ತಪಿಪಾಸು ಕಮ್ಯುನಿಷ್ಟರಿಗೆ ದೇಶಾದ್ಯಂತ ಕೆಲವು ಪತ್ರಕರ್ತರ,ಸರಕಾರದ ಆಯಕಟ್ಟಿನ ಜಾಗಗಳಲ್ಲಿರುವ ರಾಜಕಾರಣಿಗಳ,ಕೆಲವು ವೈದ್ಯರ,ಇಂಜಿನಿಯರುಗಳ ಬೆಂಬಲವಿದೆ.ಕಂಡವರ ಮಕ್ಕಳನ್ನು ನಕ್ಸಲರನ್ನಾಗಿಸಿ ಅವರ ಕೈಯಿಂದ ರಕ್ತ ಹರಿಸಿ ತಾವು ಸುಖವಾಗಿರುವ ಖದೀಮರು ಇವರು.ತಮ್ಮ ಪ್ರಭಾವವನ್ನು ಬಳಸಿ ಸರ್ಕಾರದ ವಿವಿಧ ಸವಲತ್ತುಗಳನ್ನು ಪಡೆಯುವಲ್ಲಿ ಇವರು ನಿಸ್ಸೀಮರು.ಸರ್ಕಾರ ಇವರಿಗೆ ಕೊಡುವ ಇಡುಗಂಟಿನಲ್ಲಿ ಸ್ವಲ್ಪ ಕಡಿಮೆಯಾದರೂ ಸರ್ಕಾರದ ವಿರುದ್ಧ ಕಿಡಿಕಾರುತ್ತಾರೆ.ಅಸಹಿಷ್ಣುತೆ ಇದೆ ಎಂದು ಗದ್ದಲವೆಬ್ಬಿಸುತ್ತಾರೆ.
laal-salaam
ಬಹುತೇಕ NGO ಗಳಿಗೆ ಸೇವೆಯೆಂಬುದು ನೆಪ ಮಾತ್ರ.ಸೇವೆಯ ಹೆಸರಲ್ಲಿ ತಾವು ಲಾಭ ಮಾಡಿಕೊಳ್ಳಲು ಸರ್ಕಾರವನ್ನೂ ಪ್ರಭಾವಿಸುತ್ತಾರೆ ಅವರು.NGO ನಡೆಸುವವರು ಮುಲಾಜಿಲ್ಲದೇ ಸರ್ಕಾರದಿಂದ ದೇಣಿಗೆ ಪಡೆಯುತ್ತಾರೆ.ಈ ಹಣ ನಿಜವಾದ ಉದ್ದೇಶಕ್ಕೆ ಬಳಕೆಯಾಗದೇ ನಕ್ಸಲರಿಗೆ,ಮಾವೋವಾದಿಗಳಿಗೆ,ಮತಾಂತರ ಮಾಡುವ ಸಂಸ್ಥೆಗಳಿಗೆ ಮತ್ತು ಭಯೋತ್ಪಾದಕರಿಗೆ ಹೋಗುತ್ತದೆ.ಇದನ್ನು ವಿವೇಕ್ ಅಗ್ನಿಹೋತ್ರಿ ‘Buddha in a traffic jam’ ಸಿನಿಮಾದಲ್ಲಿ ತೆರೆದಿಟ್ಟಿದ್ದಾರೆ.ಮೋದಿ ಸರ್ಕಾರ ಬಂದ ಮೇಲೆ ಸುಮಾರು NGOಗಳ ಮಾನ್ಯತೆ ರದ್ದು ಮಾಡಿ,ಅವುಗಳಿಗೆ ಕೊಡುವ ದೇಣಿಗೆಯನ್ನು ನಿಲ್ಲಿಸಿ ಅವರ ಚಟುವಟಿಕೆಗಳ ಮೇಲೆ ಹದ್ದಿನ ಕಣ್ಣಿಟ್ಟಾಗ ಬುದ್ಧಿಜೀವಿಗಳ ನೇತೃತ್ವದಲ್ಲಿ ದೇಶದಲ್ಲಿ ಅಸಹಿಷ್ಣುತೆಯ ಹೊಗೆ ಎಬ್ಬಿಸಲಾಯಿತು.ತಮಗೆ ಸರ್ಕಾರದಿಂದ ಬರುತ್ತಿದ್ದ ಸವಲತ್ತುಗಳು ನಿಂತಕೂಡಲೇ ಕೆಲ ಸಾಹಿತಿಗಳು,ಪ್ರೊಫೇಸರ್’ಗಳು ಕೆಂಡಾಮಂಡಲರಾಗಿ ಸರ್ಕಾರದ ವಿರುದ್ಧ ಘೋಷಣೆ ಕೂಗಿದರು.JNU ನಲ್ಲಿ ದೇಶದ್ರೋಹದ ಆರೋಪದ ಮೇಲೆ ಬಂಧಿತರಾದವರನ್ನು ನೇರವಾಗಿ ಬೆಂಬಲಿಸಿದರು.ಇಂಥ ಸಂದರ್ಭಗಳಲ್ಲಿ ತಮ್ಮ ಪ್ರಖರ ಲೇಖನಗಳ ಮೂಲಕ,ಬಹಿರಂಗ ಪತ್ರಗಳ ಮೂಲಕ ವಿವೇಕ್ ಅಗ್ನಿಹೋತ್ರಿ ಲಾಲ್ ಸಲಾಂನ ವೀರರಿಗೆ ತಕ್ಕ ಉತ್ತರ ಕೊಟ್ಟಿದ್ದಾರೆ.ತಮ್ಮ ಸಿನಿಮಾದಲ್ಲೂ ಎಡಬಿಡಂಗಿ ಬುದ್ಧಿಜೀವಿಗಳನ್ನು ಬೆತ್ತಲುಗೊಳಿಸಿದ್ದಾರೆ.

ಪ್ರಾಜ್ಞರೆಂದು ಜನರಿಂದ ಗೌರವಿಸಲ್ಪಡುವ ಹಿಡನ್ ಅಜೆಂಡಾವುಳ್ಳ ಕೆಲವು ಪ್ರೊಫೆಸರ್’ಗಳ,ಬುದ್ಧಿಜೀವಿಗಳ ನೈಜ ಮುಖದ ಅನಾವರಣವಾಗಬೇಕಾದರೆ,ಕ್ರಾಂತಿಯ ಹೆಸರಲ್ಲಿ ಅಮಾಯಕರನ್ನು ಹಿಂಸಿಸುವ ನಕ್ಸಲರ ಕ್ರೌರ್ಯವನ್ನು ವೈಚಾರಿಕವಾಗಿ ಬೆತ್ತಲು ಮಾಡಿದ್ದನ್ನು ನೋಡಬೇಕಾದರೆ ನೀವು ’Buddha in a traffic jam’ ಸಿನಿಮಾ ವೀಕ್ಷಿಸಲೇ ಬೇಕು.ಸಿನಿಮಾ ಕೆಲವು ಆಯ್ದ ಮಲ್ಟಿಪ್ಲೆಕ್ಸ್’ಗಳಲ್ಲಿ ಮಾತ್ರ ಬಿಡುಗಡೆಯಾಗಿತ್ತು.ಇನ್ನು ಒಂದಷ್ಟು ಕಡೆಗಳಲ್ಲಿ ವಿವೇಕ್ ಅಗ್ನಿಹೋತ್ರಿಯವರೇ ಸಾರ್ವಜನಿಕ ಪ್ರದರ್ಶನವನ್ನು ಏರ್ಪಡಿಸಿದ್ದರು.ನಾವೆಲ್ಲ ನೋಡಲೇಬೇಕಾದ ಸಿನಿಮಾವನ್ನುಈಗ ಯೂಟ್ಯೂಬ್’ನಲ್ಲಿ ವೀಕ್ಷಿಸಬಹುದು.ಕ್ರಾಂತಿಯ ಖದೀಮರ ಮುಖವಾಡ ಕಳಚುವ ‘Buddha in a traffic jam’ ಅನ್ನು ಒಮ್ಮೆ ನೋಡಿ.ಕಮ್ಯುನಿಷ್ಟರ,ದೇಶದ್ರೋಹಿಗಳ,ಎಡಪಂಥೀಯರ ಪೊಳ್ಳುತನವನ್ನು ವೈಚಾರಿಕವಾಗಿ ಬಯಲು ಮಾಡುತ್ತಿರುವ ವಿವೇಕ್ ಅಗ್ನಿಹೋತ್ರಿಯವರನ್ನು ಬೆಂಬಲಿಸಿ.ಅಂದ ಹಾಗೆ ಈ ಸಿನಿಮಾದಲ್ಲಿ ನೈತಿಕ ಪೋಲೀಸ್’ಗಿರಿ ಹೆಸರಲ್ಲಿ ಗೂಂಡಾಗಿರಿ ಮಾಡುವ ಹಿಂದೂ ಸಂಘಟನೆಗಳನ್ನೂ ಖಂಡಿಸಲಾಗಿದೆ.ಆದಷ್ಟು ಬೇಗ ಯೂಟ್ಯೂಬ್’ನಲ್ಲಿ ಈ ಚಿತ್ರವನ್ನು ನೋಡಿಬಿಡಿ.ತಮ್ಮ ಪ್ರಭಾವ ಬಳಸಿ ಕೆಂಪುಬಾವುಟದ ವೀರರು ಯಾವಾಗ ಅದನ್ನು ಯೂಟ್ಯೂಬಿನಿಂದ ತೆಗೆಸುತ್ತಾರೋ ಯಾರಿಗೆ ಗೊತ್ತು.

Buddha in a traffic jam ಸಿನಿಮಾವನ್ನು ನೇರವಾಗಿ ಇಲ್ಲಿಂದಲೇ ನೋಡಿ

Posted in ಪುಸ್ತಕ,ಸಿನಿಮಾ ವಿಮರ್ಶೆ | Leave a comment

ಸ್ವಪ್ನ ಸಂಗ್ರಾಮ

svapna-sangrama
ಮನವೆಂಬ ರಣರಂಗ ಸಜ್ಜಾಗಿದೆ
ಸ್ವಪ್ನಗಳ ಸಂಗ್ರಾಮಕೆ
ಕನಸುಗಳೇ ಪಾತ್ರಗಳಾಗಿವೆ
ನಿದ್ರೆಯಲ್ಲೂ ಮೊಳಗಿದೆ ಪಾಂಚಜನ್ಯ

ದುಸ್ವಪ್ನಗಳು ನಡೆಸಿವೆ ಮಾಯಾಯುದ್ಧ
ಗೊಂದಲದ ಗೂಡಾಗಿದೆ ಭಾವನಾಲೋಕ
ಕಾವೇರಿದೆ ಮಾಯಾಲೋಕದಿ ರಣೋತ್ಸಾಹ
ಮನದ ತುಂಬೆಲ್ಲಾ ಅವ್ಯಕ್ತ ಭಯ

ಹೋರಾಡಿ ಆಯಾಸಗೊಂಡಿವೆ ಕನಸುಗಳು
ಶೂನ್ಯ ಬದುಕಿನತ್ತ ಹೆಜ್ಜೆ ಹಾಕಿದೆ ಮನ
ಶುರುವಾಗಿದೆ ಕನಸುಗಳೇ ನಾಶವಾಗುವ ಭೀತಿ
ಆದರೂ ನಿಂತಿಲ್ಲ ಸ್ವಪ್ನ ಸಂಗ್ರಾಮ

ಹೋರಾಟದ ಪರಿಣಾಮವೇ ತಿಳಿದಿಲ್ಲ
ಗಾಯಗೊಂಡು ಮರುಗಿದೆ ಮನ
ಕನಸು ಸಾಯುತ್ತದೆ ಮನ ನರಳುತ್ತದೆ
ಸ್ವಪ್ನ ಸಂಗ್ರಾಮ ನಿಲ್ಲಲಿ ಮನವೂ ಸಾಯುವ ಮುನ್ನ

Posted in ಪದ್ಯ ಪ್ರಪಂಚ | Leave a comment

ಕನ್ನಡ ಚಿತ್ರರಂಗ ಬದಲಾಗಲು ಇದು ಪರ್ವಕಾಲ

ಇತ್ತೀಚಿನ ಎರಡು ಮೂರು ವರ್ಷಗಳಲ್ಲಿ ಕನ್ನಡದಲ್ಲಿ ಕೆಲವೊಂದು ಹೊಸ ಅಲೆಯ ಸಿನಿಮಾಗಳು ಬಂದವು.ಅವುಗಳಲ್ಲಿ ಸ್ಟಾರ್ ನಟ-ನಟಿಯರಿರಲಿಲ್ಲ.ದೊಡ್ಡ ನಿರ್ದೇಶಕರಿರಲಿಲ್ಲ.ಭರ್ಜರಿ ಫೈಟ್ಸ್ ಗಳು,ಐಟಂ ಸಾಂಗ್ ಗಳು ಇರಲಿಲ್ಲ.ಬಿಡುಗಡೆಗೆ ಮುನ್ನ ಅವುಗಳಿಗೆ ಹೆಚ್ಚು ಪ್ರಚಾರವೂ ಸಿಗುತ್ತಿರಲಿಲ್ಲ.2013ರಲ್ಲಿ ಬಂದ ‘ಲೂಸಿಯಾ’ ದಿಂದ ಹಿಡಿದು ಮೊನ್ನೆ ಮೊನ್ನೆಯ ‘ರಾಮಾ ರಾಮಾ ರೆ’ ಗಳ ತನಕ ಕೆಲವೊಂದು ವಿಭಿನ್ನ ಚಿತ್ರಗಳು ಬಂದಿವೆ.ಕನ್ನಡ ಚಿತ್ರರಂಗದ ದಿಕ್ಕು ಬದಲಾಯಿತು,ಇನ್ನೇನು ಹಳೆಯ ಮಾಸ್ ಸಿನಿಮಾಗಳ ಜಮಾನ ಹೋಗಿ ಹೊಸಬಗೆಯ ಕಲಾತ್ಮಕ ಸಿನಿಮಾಗಳೇ ಕನ್ನಡ ಚಿತ್ರರಂಗವನ್ನು ಆವರಿಸಿಕೊಳ್ಳುತ್ತವೆ ಎಂದು ನಾವು ಆಸೆಪಡುವಷ್ಟರಲ್ಲಿ ನಮ್ಮ ಸ್ಟಾರ್ ನಟರುಗಳು ತಮಗೆ ಬಿಲ್ಡಪ್ ಡೈಲಾಗ್ ಗಳಿರುವ,ಭರ್ಜರಿ ಹೊಡೆದಾಟ ಇರುವ ನೈಜತೆಗೆ ತೀರಾ ದೂರಾವಾದ ಸಿನಿಮಾಗಳನ್ನು ಮಾಡಿ ನಾವು ಮತ್ತೆ ಅದೇ ಮಾಸ್ ಸಿನಿಮಾಗಳನ್ನು ನೋಡುವಂತೆ ಮಾಡುತ್ತಾರೆ.
cover-photo
ಬಾಲಿವುಡ್ ಅನ್ನು ಹೊರತುಪಡಿಸಿ ತೆಲುಗು,ತಮಿಳಿನ ನಂತರ ಅತೀದೊಡ್ಡ ಮಾರುಕಟ್ಟೆ ಹೊಂದಿರುವುದು ಕನ್ನಡ ಚಿತ್ರರಂಗವೇ.ವರ್ಷಕ್ಕೆ ಏನಿಲ್ಲವೆಂದರೂ ನೂರರಿಂದ ನೂರೈವತ್ತು ಸಿನಿಮಾಗಳು ಕನ್ನಡದಲ್ಲಿ ಬರುತ್ತವೆ.ಅದರಲ್ಲಿ ಸ್ಟಾರ್ ನಟರ ಸಿನಿಮಾಗಳು ವರ್ಷಕ್ಕೆ ಇಪ್ಪತ್ತರಿಂದ ಮೂವತ್ತು ಇರುತ್ತವೆ ಅಷ್ಟೇ.ಅಂದರೆ ವರ್ಷಕ್ಕೆ ಬರುವ ಅಷ್ಟೂ ಸಿನಿಮಾಗಳಲ್ಲಿ ಶೇಕಡಾ ಎಪ್ಪತ್ತೈದರಷ್ಟು ಸಿನಿಮಾಗಳನ್ನು ಇನ್ನೂ ಗುರುತಿಸಿಕೊಳ್ಳದ ನಟ,ನಿರ್ದೇಶಕರುಗಳೇ ತಯಾರಿಸುತ್ತಾರೆ.ಕೆಲವೊಮ್ಮೆ ನಿರೀಕ್ಷೆಗೂ ಮೀರಿ ಈ ಹೊಸಬರ ಚಿತ್ರ ಯರ್ರಾಬಿರ್ರಿ ಹಿಟ್ ಆಗಿಬಿಡುತ್ತದೆ.ಅದಕ್ಕೆ ಒಂದಷ್ಟು ಉದಾಹರಣೆಗಳನ್ನು ಕೊಡುವುದಾದರೆ ರಂಗಿತರಂಗ,ಗೋಧಿಬಣ್ಣ ಸಾಧಾರಣ ಮೈಕಟ್ಟು,ಯೂಟರ್ನ್,ರಾಮಾ ರಾಮಾ ರೆ ಗಳನ್ನು ಪರಿಗಣಿಸಬಹುದು.ಇನ್ನು ಒಂದು ವರ್ಷಕ್ಕೆ ನೂರರಿಂದ ನೂರೈವತ್ತು ಸಿನಿಮಾಗಳು ಕನ್ನಡದಲ್ಲಿ ಬಂದರೆ ಅವುಗಳಲ್ಲಿ ಎರಡೋ ಮೂರೋ ಸಿನಿಮಾಗಳು ಮಾತ್ರ ಆ ವರ್ಷದ ಶ್ರೇಷ್ಠ ಸಿನಿಮಾಗಳೆಂದು ಗುರುತಿಸಲ್ಪಡುತ್ತವೆ.ಒಬ್ಬ ಸ್ಟಾರ್ ನಟ ವರ್ಷಕ್ಕೆ ಮೂರು ಸಿನಿಮಾಗಳಲ್ಲಿ ನಟಿಸಿದರೆ ಒಂದು ಚಿತ್ರ ಮಾತ್ರ ಸೂಪರ್ ಹಿಟ್ ಆಗಿ ನೂರು ದಿನ ಪ್ರದರ್ಶನ ಕಾಣುವ ಸಂಭವವಿರುತ್ತದೆ.ಕೆಲವೊಮ್ಮೆ ಅದೂ ಇಲ್ಲ.ಆದರೆ ಸ್ಟಾರ್ ನಟರಿಗೆ ಯಾವತ್ತೂ ನಷ್ಟವಾಗುವುದಿಲ್ಲ.ಅವರು ಅದೇ ಹಳಸಲು ಕಥೆಗಳನ್ನು ಇಟ್ಟುಕೊಂಡು ಬಿಲ್ಡಪ್ ಡೈಲಾಗ್ ಗಳು,ಫೈಟ್ ಗಳು,ಐಟಂ ಸಾಂಗ್ ಗಳನ್ನು ಇಟ್ಟುಕೊಂಡು ಸಿನಿಮಾ ಮಾಡಿದರೂ ಜನ ನೋಡೇ ನೋಡುತ್ತಾರೆ.ಅವರ ಮಾರ್ಕೆಟ್ ಯಾವತ್ತೂ ಬಿದ್ದು ಹೋಗುವುದಿಲ್ಲ.ಆದರೆ ಈ ಸ್ಟಾರ್ ನಟರ ಸಿನಿಮಾಗಳ ಭರಾಟೆಯಲ್ಲಿ ನಿಜಕ್ಕೂ ಚೆನ್ನಾಗಿರುವ ಒಂದಷ್ಟು ಹೊಸಬರ ಚಿತ್ರಗಳು ಅವುಗಳನ್ನು ಜನ ಗುರುತಿಸುವುದರೊಳಗೇ ಚಿತ್ರಮಂದಿರದಿಂದ ಎತ್ತಂಗಡಿ ಆಗುತ್ತವೆ.

ಇವತ್ತು ಭಾರತದ ಮೂಲೆ ಮೂಲೆಯಲ್ಲೂ ಆಗಿರುವ ಇಂಟರ್ನೆಟ್ ಕ್ರಾಂತಿ ಪ್ರೇಕ್ಷಕರನ್ನು ಮತ್ತಷ್ಟು ಬುದ್ಧಿವಂತರನ್ನಾಗಿಸಿದೆ.ಕೇವಲ ತನಗೆ ಗೊತ್ತಿರುವ ಭಾಷೆಯ ಸಿನಿಮಾಗಳನ್ನು ಮಾತ್ರ ಪ್ರೇಕ್ಷಕ ಇವತ್ತು ನೋಡುತ್ತಿಲ್ಲ.ಬೇರೆ ಬೇರೆ ಭಾಷೆಯ ಒಳ್ಳೊಳ್ಳೆ ಸಿನಿಮಾಗಳ ಬಗ್ಗೆ ಮಾಹಿತಿ ಬಹಳ ಬೇಗ ಸಿಗುತ್ತದೆ.ಅವುಗಳನ್ನು ಚಿತ್ರಮಂದಿರಗಳಲ್ಲೇ ನೋಡಬೇಕೆಂದೇನೂ ಇಲ್ಲ.ಟೊರೆಂಟ್ಸ್ ನ ಯುಗದಲ್ಲಿ ತಮಗೆ ಬೇಕಾದ ಭಾಷೆಯ ಚಿತ್ರಗಳನ್ನು ಸಬ್ ಟೈಟಲ್ಸ್ ಸಹಿತವಾಗಿ ಡೌನ್ಲೋಡ್ ಮಾಡಿಕೊಂಡು ಮನೆಯಲ್ಲೇ ಕುಳಿತು ನೋಡುವ ಸ್ವಾತಂತ್ರ್ಯ ಇದೆ.ಈಗ ಟೊರೆಂಟ್ಸ್ ನಿಷೇಧಕ್ಕೊಳಗಾಗಿದ್ದರೂ ಬೇರೆ ಬೇರೆ ಭಾಷೆಯ ಸಿನಿಮಾಗಳನ್ನು ಡೌನ್ಲೋಡ್ ಮಾಡಿಕೊಳ್ಳಲೆಂದೇ ಅನೇಕ ಜಾಲತಾಣಗಳೂ ಇವೆ.ಹಾಗಾಗಿ ಕನ್ನಡದ ಪ್ರೇಕ್ಷಕ ಇಲ್ಲಿನ ಚಿತ್ರಗಳನ್ನು ಬೇರೆ ಭಾಷೆಯ ಸಿನಿಮಾಗಳ ಜೊತೆ ಕಂಪೇರ್ ಮಾಡುತ್ತಾನೆ.ಮಲಯಾಳಂ,ಮಾರಾಠಿ,ಗುಜರಾತಿ,ಬಂಗಾಳಿ ಭಾಷೆಯ ಸಿನಿಮಾಗಳ ಮುಂದೆ ಕನ್ನಡದ ಸಿನಿಮಾಗಳು ಇನ್ನೂ ಎಳಸು ಅಂತ ಪ್ರೇಕ್ಷಕನಿಗೆ ಅನ್ನಿಸುತ್ತದೆ.ಇತರ ಭಾಷೆಗಳ ಸ್ಟಾರ್ ನಟರು ಬಿಲ್ಡಪ್ ಇಲ್ಲದೆ,ಫೈಟ್ಸ್ ಗಳಿಲ್ಲದೆ ಸುಂದರ ಕಲಾತ್ಮಕ ಸಿನಿಮಾಗಳಲ್ಲಿ ನಟಿಸುವುದನ್ನು ನೋಡಿ ಕನ್ನಡದ ಸ್ಟಾರ್ ನಟರೇಕೆ ತಮ್ಮ ಸ್ಟಾರ್ ಇಮೇಜ್ ನಿಂದ ಆಚೆ ಬಂದು ಹೊಸ ಥರದ ಸಿನಿಮಾಗಳಲ್ಲಿ ನಟಿಸುವುದಿಲ್ಲ ಅನ್ನಿಸುತ್ತದೆ.

ಸುಮ್ಮನೇ ಉದಾಹರಣೆಗಾಗಿ ಮಲಯಾಳಂ ಚಿತ್ರರಂಗವನ್ನು ಪರಿಗಣಿಸೋಣ.ಒಂದು ಕಾಲದಲ್ಲಿ ಬಿ ಗ್ರೇಡ್ ನ ವಯಸ್ಕರ ಚಿತ್ರಗಳಿಗೆ ಕುಖ್ಯಾತಿ ಪಡೆದಿದ್ದ ಮಲಾಯಾಳಂ ಇಂಡಸ್ಟ್ರಿ ಇವತ್ತು ಬಾಲಿವುಡ್ ನ ನಂತರ ಚಿತ್ರಗಳ ಗುಣಮಟ್ಟದಲ್ಲಿ ಭಾರತದಲ್ಲೇ ಅಗ್ರಸ್ಥಾನವನ್ನು ಪಡೆದಿದೆ.ಅಲ್ಲೂ ಕನ್ನಡದಂತೆ ವರ್ಷಕ್ಕೆ ನೂರರಿಂದ ನೂರೈವತ್ತು ಸಿನಿಮಾಗಳು ಬರುತ್ತವೆ.ಸ್ಟಾರ್ ನಟರ ಸಿನಿಮಾಗಳು ಮೂವತ್ತರಿಂದ ನಲವತ್ತು ಬರುತ್ತವೆ.ಆದರೆ ಬಹುತೇಕ ಎಲ್ಲ ಚಿತ್ರಗಳೂ ಗುಣಮಟ್ಟದಲ್ಲಿ ಬೇರೆ ಭಾಷೆಯ ಸಿನಿಮಾಗಳಿಗೆ ಹೋಲಿಸಿದರೆ ತುಂಬಾ ಚೆನ್ನಾಗಿರುತ್ತವೆ.ಒಂದೋ ಉತ್ಕೃಷ್ಟ ದರ್ಜೆಯ ಕಥೆ ಇರುತ್ತದೆ.ಇಲ್ಲವಾದರೆ ಸಾಧಾರಣ ಕಥೆಯನ್ನಿಟ್ಟುಕೊಂಡೇ ಸಿನಿಮಾವನ್ನು ಗೆಲ್ಲಿಸಬಲ್ಲ ಒಳ್ಳೆಯ ಚಿತ್ರಕಥೆ ಇರುತ್ತದೆ.ಮಲಯಾಳಂ ನ ಸ್ಟಾರ್ ನಟರು ಬಿಲ್ಡಪ್ ಡೈಲಾಗ್ ಗಳನ್ನು,ಹೊಡೆದಾಟದ ದೃಶ್ಯಗಳನ್ನು ಬಿಟ್ಟು ಯಾವುದೋ ಕಾಲವಾಗಿದೆ.ಬಹುತೇಕ ಎಲ್ಲ ಸ್ಟಾರ್ ನಟರೂ ಹೊಸ ರೀತಿಯ ಕಲಾತ್ಮಕ ಚಿತ್ರಗಳಲ್ಲಿ ನಟಿಸುತ್ತಾರೆ.ಹೊಸ ಹೊಸ ಪ್ರಯೋಗಗಳಿಗೆ ತಮ್ಮನ್ನು ಒಡ್ಡಿಕೊಳ್ಳುತ್ತಾರೆ.ಎಂದಿನ ಮಾಸ್ ಡೈಲಾಗ್ ಗಳು,ಐಟಂ ಸಾಂಗ್ ಗಳು ಈ ಕಾಲಕ್ಕೆ ವರ್ಕೌಟ್ ಆಗಲಾರವು ಎಂಬುದನ್ನು ಮಲಯಾಳಂ ನ ಸ್ಟಾರ್ ಗಳು ಅರ್ಥ ಮಾಡಿಕೊಂಡಿದ್ದಾರೆ.ಅಲ್ಲಿನ ಹೊಸಬರ ಸಿನಿಮಾಗಳೂ ಅಷ್ಟೇ.ಸ್ಟಾರ್ ನಟರು ಇಲ್ಲ ಎಂಬುದನ್ನು ಬಿಟ್ಟರೆ ಕಥೆಯಲ್ಲಾಗಲಿ,ಚಿತ್ರಕಥೆಯಲ್ಲಾಗಲೀ.ಮೇಕಿಂಗ್ ನಲ್ಲಾಗಲಿ ಯಾವುದೇ ರೀತಿಯಲ್ಲೂ ಸ್ಟಾರ್ ನಟರ ಚಿತ್ರಗಳಿಗಿಂತ ಕಮ್ಮಿ ಅಂತ ಅನ್ನಿಸುವುದೇ ಇಲ್ಲ.ಮಲಯಾಳಂ ನ ಸ್ಟಾರ್ ನಟ ಪೃಥ್ವಿರಾಜ್ ಸುಕುಮಾರನ್ ಅವರನ್ನು ಉದಾಹರಣೆಗೆ ನೋಡುವುದಾರೆ ಅವರು ವರ್ಷಕ್ಕೆ ಹೆಚ್ಚೆಂದರೆ ನಾಲ್ಕರಿಂದ ಆರು ಸಿನಿಮಾಗಳಲ್ಲಿ ನಟಿಸುತ್ತಾರೆ.ಅವರ ಇತ್ತೀಚಿನ ಯಾವ ಸಿನಿಮಾಗಳಲ್ಲೂ ಬಿಲ್ಡಪ್ ಡೈಲಾಗ್ ಗಳು,ಹೊಡೆದಾಟದ ಸೀನ್ ಗಳು ಇರುವುದಿಲ್ಲ.ಬೇರೆ ಬೇರೆ ರೀತಿಯ ಕಲಾತ್ಮಕ ಚಿತ್ರಗಳು,ಥ್ರಿಲ್ಲರ್,ರೊಮ್ಯಾಂಟಿಕ್ ಚಿತ್ರಗಳಲ್ಲಿ ಪೃಥ್ವಿರಾಜ್ ನಟಿಸುತ್ತಾರೆ.ಎಲ್ಲವೂ ಸೂಪರ್ ಹಿಟ್ ಆಗುತ್ತವೆ.ನಮ್ಮಲ್ಲಿರುವಂತೆ ಅಲ್ಲಿಯೂ ಪೃಥ್ವಿರಾಜ್ ಗೆ ಅಭಿಮಾನಿ ಸಂಘಗಳಿವೆ.ಅಭಿಮಾನವನ್ನೂ ಮೀರಿದ ಭಕ್ತರೂ ಇದ್ದಾರೆ.ಆ ಅಭಿಮಾನಿಗಳು ಹುಚ್ಚೆದ್ದು ಕುಣಿಯುವಂತೆ ಮಾಡಲು ಬಿಲ್ಡಪ್ ಡೈಲಾಗ್ ಗಳನ್ನು ಇಟ್ಟುಕೊಂಡು,ಅದ್ಧೂರಿ ಹೊಡೆದಾಟದ ಸೀನ್ ಗಳನ್ನು ಹಾಕಿಕೊಂಡು ಎರಡು ವರ್ಷಕೊಮ್ಮೆ ಪೃಥ್ವಿರಾಜ್ ಮಾಸ್ ಸಿನಿಮಾದಲ್ಲೂ ನಟಿಸುತ್ತಾರೆ.ಅದು ಕೇವಲ ಅಭಿಮಾನಿಗಳನ್ನು ಅತಿಯಾಗಿ ರಂಜಿಸಲು ಮಾತ್ರ.ಅದು ಬಿಟ್ಟರೆ ವರ್ಷವಿಡೀ ಕ್ಲಾಸ್ ಸಿನಿಮಾಗಳನ್ನೇ ಮಾಡುತ್ತಾರೆ.ಇವತ್ತು ಟೊರೆಂಟ್ಸ್ ನಲ್ಲಿ ಮಲಯಾಳಂ ಸಿನಿಮಾಗಳನ್ನು ಡೌನ್ಲೋಡ್ ಮಾಡಿಕೊಂಡು ನೋಡುವ ನಮಗೆ ನಮ್ಮ ಕನ್ನಡದ ಸ್ಟಾರ್ ನಟರೂ ಏಕೆ ಕಲಾತ್ಮಕ,ಕ್ಲಾಸ್ ಚಿತ್ರಗಳಲ್ಲಿ ನಟಿಸಬಾರದು?ಅದೇ ಮಾಸ್ ಸಿನಿಮಾಗಳಿಗೆ ಜೋತುಬಿದ್ದುಕೊಂಡಿರುವುದೇಕೆ ಅಂತ ಅನ್ನಿಸದೇ ಇರಲಾರದು.

ಒಳ್ಳೊಳ್ಳೆ ಸಿನಿಮಾಗಳು ಕನ್ನಡದಲ್ಲೂ ಬರುತ್ತಿವೆ.ಹೊಸಬರು ಭಿನ್ನ ರೀತಿಯ ಕ್ಲಾಸ್ ಸಿನಿಮಾಗಳನ್ನು ಮಾಡುತ್ತಿದ್ದಾರೆ.ಕನ್ನಡ ಚಿತ್ರರಂಗ ಬದಲಾಗುತ್ತಿದೆ ಅಂತ ನಾವೆಷ್ಟೇ ಒದರಾಡಿದರೂ ಸಿನಿಮಾರಂಗದ ಟ್ರೆಂಡ್ ಬದಲಾಯಿಸಲು ಸಾಧ್ಯವಿರುವುದು ಮೊದಲೇ ಹೆಸರು ಗಳಿಸಿರುವ ಸ್ಟಾರ್ ನಟ,ನಿರ್ದೇಶಕರ ಕೈಯಲ್ಲಿ ಮಾತ್ರ.ನಿರ್ದೇಶಕ ಬಿ.ಎಂ.ಗಿರಿರಾಜ್ ಅವರು ‘ಮೈತ್ರಿ’ ಎಂಬ ಕನ್ನಡ ಸಿನಿಮಾವನ್ನು ಮಾಡಿದ್ದರು.ಮಲಯಾಳಂ ನ ಸೂಪರ್ ಸ್ಟಾರ್ ಮೋಹನ್ ಲಾಲ್ ಆ ಸಿನಿಮಾದ ಮುಖ್ಯ ಭೂಮಿಕೆಯಲ್ಲಿರುತ್ತಾರೆ,ಕನ್ನಡದ ಪವರ್ ಸ್ಟಾರ್ ಪುನೀತ್ ರಾಜ್ ಕುಮಾರ್ ಅದರಲ್ಲಿ ಅತಿಥಿ ಪಾತ್ರದಲ್ಲಿ ನಟಿಸಿದ್ದಾರೆ ಅಂತ ಚಿತ್ರ ಬಿಡುಗಡೆ ಆಗುವವರೆಗೂ ಪ್ರಚಾರ ಮಾಡಲಾಯಿತು.ಸಣ್ಣ ಅತಿಥಿ ಪಾತ್ರದಲ್ಲಿ ಪುನೀತ್ ಏನು ಮಾಡಿರಬಹುದು ಎಂದು ನೋಡಲು ಅವರ ಮಾಸ್ ಸಿನಿಮಾಗಳ ಅಭಿಮಾನಿಗಳೆಲ್ಲ ಮುಗಿಬಿದ್ದು ಚಿತ್ರಮಂದಿರಕ್ಕೆ ಹೋದರು.ಎಲ್ಲರಿಗೂ ಚಿತ್ರ ನೋಡಿದ ಮೇಲೆಯೇ ಗೊತ್ತಾಗಿದ್ದು.‘ಮೈತ್ರಿ’ಯಲ್ಲಿ ಪುನೀತ್ ಅವರದ್ದು ಅತಿಥಿ ಪಾತ್ರವಲ್ಲ,ಚಿತ್ರದ ನಾಯಕನೇ ಅವರು ಅಂತ.ಇದನ್ನು ಏಕೆ ಹೇಳಿದೆ ಅಂದರೆ ಸ್ಟಾರ್ ನಟರು ಎಂಥ ಸಿನಿಮಾಗಳಲ್ಲಿ ನಟಿಸಿದರೂ ಜನ ನೋಡಿಯೇ ನೋಡುತ್ತಾರೆ.ಮಾಸ್ ಚಿತ್ರವಾದರೂ ಅಷ್ಟೇ,ಕಲಾತ್ಮಕ ಚಿತ್ರವಾದರೂ ಅಷ್ಟೇ.ಅಭಿಮಾನಿ ದೇವರುಗಳು ತಮ್ಮ ನೆಚ್ಚಿನ ನಟರ ಸಿನಿಮಾಗಳನ್ನು ನೋಡಿಯೇ ನೋಡುತ್ತಾರೆ.ಹಾಗಿರುವಾಗ ತಮ್ಮ ಎಂದಿನ ಮಾಸ್ ಇಮೇಜ್ ಅನ್ನು ಬದಿಗಿಟ್ಟು,ವಿಭಿನ್ನ ರೀತಿಯ ಕಲಾತ್ಮಕ ಚಿತ್ರಗಳಲ್ಲಿ ಸ್ಟಾರ್ ನಟರು ನಟಿಸಿದರೆ ಅವರ ಮಾರ್ಕೆಟ್ ಏನೂ ಬಿದ್ದು ಹೋಗುವುದಿಲ್ಲ.ಇವತ್ತು ವಿಭಿನ್ನ ರೀತಿಯ,ಹೊಸ ಅಲೆಯ ಸಿನಿಮಾಗಳನ್ನು ನಿರ್ದೇಶಿಸುವ ನಿರ್ದೇಶಕರೆಲ್ಲರೂ ಬಳಸಿಕೊಳ್ಳುವುದು ಇನ್ನೂ ಹೆಸರು ಮಾಡದ ಹೊಸ ನಟರನ್ನೇ.ಆ ನಿರ್ದೇಶಕರುಗಳಿಗೆ ಸ್ಟಾರ್ ನಟರನ್ನು ಹಾಕಿಕೊಂಡು ಸಿನಿಮಾ ಮಾಡಲು ಒಂಥರಾ ಭಯ.ತಮ್ಮ ಸಿನಿಮಾ ಫ್ಲಾಪ್ ಆದರೆ ಏನು ಮಾಡುವುದು?ಅದರಿಂದ ಅವರ ಸ್ಟಾರ್ ಇಮೇಜ್ ಬಿದ್ದುಹೋದರೆ ಏನು ಕಥೆ ಎಂಬ ಆಲೋಚನೆಗಳಿಂದಾಗಿಯೇ ಅವರು ಸ್ಟಾರ್ ನಟರನ್ನು ಹಾಕಿಕೊಂಡು ಸಿನಿಮಾ ಮಾಡುವುದಿಲ್ಲ.ಅದಕ್ಕೆ ಸರಿಯಾಗಿ ಸ್ಟಾರ್ ನಟರೂ ಹಾಗೇ ವರ್ತಿಸುತ್ತಾರೆ.ಅವರಿಗೆ ಹೊಸ ನಿರ್ದೇಶಕರೊಂದಿಗೆ ಸಿನಿಮಾ ಮಾಡುವ ಧೈರ್ಯವಿಲ್ಲ.

ಕನ್ನಡದಲ್ಲಿ ಹೊಸ ನಿರ್ದೇಶಕರ ಒಳ್ಳೆ ಕ್ಲಾಸ್ ಸಿನಿಮಾಗಳು ಬಂದರೂ ಅವುಗಳಿಗೆ ಇಲ್ಲಿ ಚಿತ್ರಮಂದಿರಗಳು ಸಿಗುವುದು ಕಡಿಮೆ.ಒಂದೊಮ್ಮೆ ಸಿಕ್ಕರೂ ಸ್ಟಾರ್ ನಟರ ಮಾಸ್ ಸಿನಿಮಾಗಳ ಮುಂದೆ ಹೊಸಬರ ಒಳ್ಳೆ ಕ್ಲಾಸ್ ಸಿನಿಮಾ ಥಿಯೇಟರ್ ಗಳಲ್ಲಿ ನಿಲ್ಲುವುದಿಲ್ಲ.ಆದರೆ ಸ್ಟಾರ್ ನಟರಿಗೆ ಥಿಯೇಟರ್ ಗಳ ಸಮಸ್ಯೆ ಎಂದಿಗೂ ಉದ್ಭವವಾಗುವುದಿಲ್ಲ.ಅವರು ಎಂಥ ಸಿನಿಮಾ ಮಾಡಿದರೂ ಜನ ಚಿತ್ರಮಂದಿರಕ್ಕೆ ಹೋಗಿ ನೋಡಿಯೇ ನೋಡುತ್ತಾರೆ.ಹಾಗಿರುವಾಗ ಅವರು ಕನ್ನಡ ಚಿತ್ರರಂಗದ ಅಭ್ಯುದಯದ ದೃಷ್ಟಿಯಿಂದ ಹೊಸ ನಿರ್ದೇಶಕರ ಜೊತೆ ಕಲಾತ್ಮಕ ಚಿತ್ರಗಳನ್ನು ಮಾಡಿದರೂ ತಮ್ಮ ಸ್ಟಾರ್ ಇಮೇಜ್,ಮಾರ್ಕೆಟ್ ಉಳಿಸಿಕೊಳ್ಳುತ್ತಾರೆ.ಕ್ಲಾಸ್ ಚಿತ್ರಗಳಲ್ಲಿ ಸ್ಟಾರ್ ನಟರು ನಟಿಸುವುದು ಶುರುವಾದ ಕೂಡಲೇ ಅಂಥದ್ದೇ ಸಿನಿಮಾಗಳನ್ನು ಮಾಡುವ ಹೊಸಬರೂ ಹೆಚ್ಚು ಬೆಳಕಿಗೆ ಬರುತ್ತಾರೆ.ಅವರಿಗೂ ಚಿತ್ರಮಂದಿರಗಳು ಸಿಗುತ್ತವೆ.ಹೊಸ ನಿರ್ದೇಶಕರಿಗೂ ತಾವು ಸ್ಟಾರ್ ನಟರನ್ನು ಹಾಕಿಕೊಂಡೇ ಕ್ಲಾಸ್ ಸಿನಿಮಾಗಳನ್ನು ಮಾಡಬಲ್ಲೆವು ಎಂಬ ಧೈರ್ಯ ಬರುತ್ತದೆ.ಇವತ್ತಿನ ಪರಿಸ್ಥಿತಿಯಲ್ಲಿ ಸ್ಟಾರ್ ಗಳ ಮಾಸ್ ಸಿನಿಮಾಗಳ ಮುಂದೆ ಹೊಸಬರ ಒಳ್ಳೆ ಕ್ಲಾಸ್ ಸಿನಿಮಾಗಳು ತಮ್ಮ ಅಸ್ತಿತ್ವವನ್ನು ಉಳಿಸಿಕೊಳ್ಳಲು ಹೆಣಗಾಡಬೇಕಾಗುತ್ತದೆ.ಹಾಗಾಗಿ ಹೊಸ ನಟರು,ನಿರ್ದೇಶಕರು ಕನ್ನಡ ಚಿತ್ರರಂಗವನ್ನು ಬದಲಿಸುವುದು ಅಷ್ಟು ಸುಲಭವಲ್ಲ.ಸ್ಟಾರ್ ಗಳು ಬಿಲ್ಡಪ್,ಫೈಟ್ಸ್,ಐಟಂ ಸಾಂಗ್ ಗಳು ಇಲ್ಲದ ಒಳ್ಳೆ ಕಥೆ,ಚಿತ್ರಕಥೆಯುಳ್ಳ,ವಾಸ್ತವತೆಗೆ ಹತ್ತಿರವಾದ ಕ್ಲಾಸ್ ಸಿನಿಮಾಗಳಲ್ಲಿ ಹೆಚ್ಚು ಹೆಚ್ಚು ನಟಿಸಿದರೆ ಕನ್ನಡ ಚಿತ್ರರಂಗದ ಟ್ರೆಂಡ್ ಬದಲಾಗಬಹುದು.
cover-photo-2
ಕನ್ನಡದಲ್ಲಿ ಹೊಸ ರೀತಿಯ ಕಥೆಗಳನ್ನು ತಯಾರಿಸುವ ಬರಹಗಾರರಿಗೇನೂ ಕೊರತೆಯಿಲ್ಲ.ಬೇರೆಲ್ಲ ಭಾಷೆಗಳಿಗಿಂತ ಕನ್ನಡದ ಸಾಹಿತ್ಯ ಶ್ರೀಮಂತವಾಗಿದೆ.ಅತೀ ಹೆಚ್ಚು ಜ್ಞಾನಪೀಠ ಪ್ರಶಸ್ತಿಗಳನ್ನು ಪಡೆದ ಹೆಗ್ಗಳಿಕೆ ಕನ್ನಡದ್ದು.ಹಾಗಿದ್ದೂ ಕನ್ನಡ ಚಿತ್ರರಂಗ ಮಾತ್ರ ಇನ್ನೂ ಒಳ್ಳೆಯ ಗುಣಮಟ್ಟದ ಚಿತ್ರಗಳನ್ನು ಹೆಚ್ಚಾಗಿ ತಯಾರಿಸುತ್ತಿಲ್ಲವೆಂಬುದು ನೋವಿನ ಸಂಗತಿ.ಇವತ್ತು ಕನ್ನಡದ ಒಬ್ಬ ಹೆಸರಾಂತ ಲೇಖಕನ ಕಥೆಯನ್ನೋ ಕಾದಂಬರಿಯನ್ನೋ ಸಿನಿಮಾ ಮಾಡುವ ಮೊದಲು ನಿರ್ದೇಶಕನೊಬ್ಬ ಸಾವಿರ ಬಾರಿ ಆಲೋಚಿಸುವ ಪರಿಸ್ಥಿತಿ ಇದೆ.ಏಕೆಂದರೆ ಸ್ಟಾರ್ ನಟರು ಯಾರೂ ಕಾದಂಬರಿ ಆಧಾರಿತ ಚಿತ್ರಗಳನ್ನು ಒಪ್ಪಿಕೊಳ್ಳುವುದಿಲ್ಲ.ಹೊಸಬರನ್ನು ಹಾಕಿಕೊಂಡು ಮಾಡಿದರೆ ಚಿತ್ರ ಗೆಲ್ಲದಿದ್ದರೆ ಎಂಬ ಭಯ ನಿರ್ದೇಶಕನಿಗಿರುತ್ತದೆ.ಇದನ್ನು ಹೋಗಲಾಡಿಸುವ ಕೆಲಸವನ್ನು ಸ್ಟಾರ್ ನಟರು ಮಾಡಬೇಕಿದೆ.ತಮ್ಮ ಎಂದಿನ ಮಾಸ್ ಇಮೇಜ್ ನಿಂದ ಹೊರಬಂದು ಕಲಾತ್ಮಕ ಚಿತ್ರಗಳಲ್ಲಿ ಹೆಚ್ಚು ಹೆಚ್ಚು ನಟಿಸಬೇಕಾಗಿದೆ.

‘ಮಾಸ್ತಿಗುಡಿ’ ಸಿನಿಮಾದ ಚಿತ್ರೀಕರಣದ ಸಮಯದಲ್ಲಿ ಹೆಲಕಾಪ್ಟರ್ ನಿಂದ ಹಾರಿ ಜಲಸಾಮಾಧಿಯಾದ ಕನ್ನಡದ ಉದಯೋನ್ಮುಖ ನಟರಾದ ಉದಯ್ ಮತ್ತು ಅನಿಲ್ ಅವರ ಸಾವು ಕನ್ನಡ ಚಿತ್ರರಂಗಕ್ಕೊಂದು ಪಾಠವಾಗಬೇಕು.ಹೆಲಿಕಾಪ್ಟರ್ ನಿಂದ ಹಾರುವ,ಗಾಜು ಒಡೆಯುವ,ಒಬ್ಬನೇ ಹೀರೋ ಇಪ್ಪತ್ತು ಜನರನ್ನು ಹೊಡೆಯುವ ಹಳೇ ಕಾಲದ ಮಾಸ್ ಇಮೇಜ್ ಗೆ ನಮ್ಮ ಸ್ಟಾರ್ ನಟರು ಇನ್ನೂ ಏಕೆ ಜೋತು ಬಿದ್ದಿದ್ದಾರೋ ಗೊತ್ತಿಲ್ಲ.ಅಂಥ ಚಿತ್ರಗಳನ್ನು ಜನರು ಶಿಳ್ಳೆ ಹೊಡೆದು ಚಿತ್ರಮಂದಿರಗಳಲ್ಲಿ ನೋಡುವುದನ್ನೂ ಕಡಿಮೆ ಮಾಡಬೇಕು.ಕೇವಲ ಸ್ಟಾರ್ ನಟರನ್ನು ಮಾತ್ರ ಏಕೆ ದೂಷಿಸುತ್ತೀರಿ,ಮಾಸ್ ಸಿನಿಮಾಗಳನ್ನು ಮಾಡುವಲ್ಲಿ ನಿರ್ದೇಶಕನದ್ದೂ ಪಾಲಿದೆ ಅಲ್ಲವೇ ಅಂತ ಪ್ರಶ್ನಿಸಬಹುದು.ಆದರೆ ಕನ್ನಡ ಚಿತ್ರರಂಗ ಇವತ್ತು ಹೇಗಿದೆಯೆಂದರೆ ಸ್ಟಾರ್ ನಟರ ಚಿತ್ರಗಳಿಗೆ ಹೆಸರಿಗೆ ಮಾತ್ರ ನಿರ್ದೇಶಕ ಇರುತ್ತಾನೆ.ಉಳಿದಂತೆ ಇಡೀ ಚಿತ್ರ ಹೇಗೆ ಮೂಡಿ ಬರಬೇಕು ಎಂದು ತೀರ್ಮಾನಿಸುವುದು ನಾಯಕ ನಟರೇ.ಕೆಲವೊಮ್ಮೆ ನಿರೀಕ್ಷಿತ ಮಟ್ಟದಲ್ಲಿ ಸ್ಟಾರ್ ನಟರು ನಟಿಸದಿದ್ದಾಗ,ನಿಮ್ಮ ನಟನೆ ಸರಿಯಾಗಿಲ್ಲ.ತಿದ್ದಿಕೊಂಡು ಮತ್ತೊಮ್ಮೆ ಟೇಕ್ ತೆಗೆದುಕೊಳ್ಳಿ ಎಂದು ನಟರಿಗೆ ಹೇಳುವ ಧೈರ್ಯವೂ ಎಷ್ಟೋ ನಿರ್ದೇಶಕರಿಗಿಲ್ಲ.ಹಾಗಾಗಿ ಸ್ಟಾರ್ ನಟರು ಮನಸ್ಸು ಮಾಡಿ ತಮ್ಮ ಹೀರೋ ಇಮೇಜ್ ನಿಂದ ಹೊರಬಂದು ಕಲಾತ್ಮಕ ಚಿತ್ರಗಳಲ್ಲಿ ಹೆಚ್ಚು ಹೆಚ್ಚಾಗಿ ನಟಿಸಿದರೆ ಕನ್ನಡ ಚಿತ್ರರಂಗದ ಸುವರ್ಣ ಅಧ್ಯಾಯ ಮತ್ತೊಮ್ಮೆ ಆರಂಭವಾಗುತ್ತದೆ.

ಒಂದು ಚಿತ್ರರಂಗಕ್ಕೆ ಕ್ಲಾಸ್ ಸಿನಿಮಾಗಳೂ ಬೇಕು.ಮಾಸ್ ಸಿನಿಮಾಗಳೂ ಬೇಕು.ಹಾಗಂತ ಹಳೇ ಕಾಲದ ಸಿದ್ಧಾಂತಗಳನ್ನೇ ನೆಚ್ಚಿಕೊಂಡು ಸ್ಟಾರ್ ನಟರು ಢಂ ಢಂ ಡಿಶುಂ ಡಿಶುಂ ಎನ್ನುತ್ತ ಬರೀ ಮಾಸ್ ಸಿನಿಮಾಗಳನ್ನೇ ಮಾಡುತ್ತ ಹೋದರೆ ಮುಂದಿನ ವರ್ಷಗಳಲ್ಲಿ ಅವರು ತಮ್ಮ ಮಾರುಕಟ್ಟೆಯನ್ನು ಕಳೆದುಕೊಳ್ಳುವ ಸ್ಥಿತಿ ಬಂದರೂ ಬರಬಹುದು.ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸಗಳಲ್ಲಿ,ಆಸ್ಕರ್ ಗೆ ಭಾರತದಿಂದ ನಾಮಿನೆಟ್ ಆಗುವಲ್ಲಿ ಬೇರೆ ಭಾಷೆಯ ಚಿತ್ರಗಳ ಜೊತೆ ಕನ್ನಡದ ಚಿತ್ರಗಳೂ ಸ್ಪರ್ಧಿಸಿ ಗೆಲ್ಲಬೇಕಾದರೆ ನಮ್ಮ ಸ್ಟಾರ್ ನಟರು ಕಲಾತ್ಮಕ ಚಿತ್ರಗಳನ್ನು ತಯಾರಿಸುವುದು ಅನಿವಾರ್ಯ.ಅದು ಈಗಲೇ ಆಗಬೇಕಿದೆ.ಇಲ್ಲವಾದರೆ ಬೇರೆ ಭಾಷೆಯ ಸಿನಿಮಾಗಳ ಪ್ರಭಾವಕ್ಕೆ ಒಳಗಾಗಿ ಪ್ರೇಕ್ಷಕ ಕನ್ನಡದ ಸ್ಟಾರ್ ನಟರ ಮಾಸ್ ನಿನಿಮಾಗಳನ್ನು ಸರಾಸಗಟಾಗಿ ತಿರಸ್ಕರಿಸುವ ಕಾಲವೂ ಬರಬಹುದು.

Posted in ಲೇಖನಗಳು | Leave a comment