ಕಣ್ಣು ಮಾತ್ರ ಕಂಡರೆ ಸಾಕೇ
ಆತ್ಮಕ್ಕೂ ಕಾಣಬೇಡವೇ ಸೌಂದರ್ಯ
ರಸಾನುಭೂತಿಯಲಿ ದೇಹ ತೇಲುವುದು
ಆತ್ಮ ಪರಿತಪಿಸಿ ನರಳುವುದು
ಹಲವು ರೀತಿಯ ನೂರಾರು ಲಹರಿ
ಅನಂತಾನಂತ ಈ ಸೌಂದರ್ಯದ ಪರಿ
ಕಣ್ಣಿಗೆ ಕಾಣುವುದು ಸಹಸ್ರ ರೀತಿ
ಆತ್ಮಾನುಭವದಲಿರುವುದು ಒಂದೇ ಲಹರಿ
ದೇಹ ಸೌಂದರ್ಯಕೆ ಮರುಳಾಗುವರು
ಆತ್ಮೋನ್ನತಿಯಿಲ್ಲದೆ ನರಳುವರು
ನಯನ ನೋಡುವುದು ಲೌಕಿಕ ಸೌಂದರ್ಯ
ಆತ್ಮಕ್ಕೆ ಕಾಣುವುದು ಭವ ಮೀರಿದ್ದು ಮಾತ್ರ
ಆತ್ಮ ಸಿಕ್ಕಿದ್ದು ವಿಶ್ವತೋಮುಖನಿಂದ
ದೇಹ ಲಭಿಸಿದ್ದು ಪ್ರಕೃತಿ ಪುರುಷರಿಂದ
ದೇವನೊಬ್ಬ ಆತ್ಮರೂಪಿ
ಹಲವು ನಾಮಗಳಿಂದಾತ ಸೌಂದರ್ಯರೂಪಿ
ಸೌಂದರ್ಯವನೇ ಪೂಜಿಸುವರೆಲ್ಲ
ಆತ್ಮಕ್ಕೆ ಹವಿಸ್ಸು ನೀಡುವವರಿಲ್ಲ
ದೇಹ ಸೌಂದರ್ಯದಿಂದ ವಿರಕ್ತಿ
ಆತ್ಮಾನಂದದಿಂದ ಮುಕ್ತಿ
ಅಲೌಕಿಕದ ಕಣ್ಣು ತೆರೆಯಲಿ
ಆತ್ಮ ಸೌಂದರ್ಯವ ಆರಾಧಿಸಲಿ
ದೇಹ ಸೌಂದರ್ಯಕ್ಕಿದೆ ಮೃತ್ಯು
ಆತ್ಮ ಸೌಂದರ್ಯವೆಂದೂ ಅಜಾತಶತ್ರು